Social Anxiety Disorder Kya Hai Aur Ye Kyu Hota Hai? – Jaaniye Sab Kuch Hindi Me

Social anxiety disorder kya hai? Iske baare me aapne to suna hi hoga. Kuch log kehte hai na ki unko social anxiety hai. Ya fir log kehte hai ki unko bahar jaana pasand nahi, ya naye logo se milna pasand nahi, ya fir unhe logo ke sath itna comfortable feel nahi hota.

Abhi kuch dino pehle hi case saamne aaya tha Social anxiety disorder ka. Poora vakya batata hu mai, padhte rahiye. To hua yun ki ek 17 saal ka ladka tha. Wo padhne me kaafi tej tha lekin jab bhi usko speech dene ko bola jaata ya fir kisi bhi tarah ka presentation dene ke liye teacher bolte to wo kaafi had tak ghabra jaata tha.

Ab ye baat, of course, normal to hai nahi. Isliye uske mummy-papa ne usko psychologist (manovaigyanik) ke pass le gaye. Psychologist ne unhe bataya ki unke bete ko Social Phobia ya (social anxiety) hai.

Social Anxiety Disorder Kya Hai?

Social Anxiety Disorder kya hai – ye ek aisi sthiti hai jisme rogi khud ko logo ke beech insecure mehsus karta hai. Social anxiety se grasit logo ko bahar jaane me kaafi pareshani hoti hai. Unhe aisa lagta hai ki unko baaki log judge karte hai. Ya fir doosre log unke baare me kya sochenge – wagairah wagairah.

Social phobia se grasit log public places se door rehna pasand karte hai aur jaldi kisi public gathering ka hissa nahi bante. Aise logo ko kisi ki shadi ya kisi anya party me jaana bhi pasand nahi hota. Overall, ye apne aap me rehna pasand karte hai. Itna hi nahi, ye public place par khana-waana khaane se bhi ghabraate hai.

Social Anxiety Disorder Kab Aur Kyu Hota Hai?

“Social anxiety disorder kab aur kyu hota hai” ka jawaab itna aasan nahi. Social phobia ki shuruaat generally teenage me hi hoti hai jab insaan psychologically kaafi weak hota hai. Ye ek aisa time hota hai jab insaan nayi-nayi chize discover aur uske baare me sikh raha hota hai.

Tabhi to bade bujurgo ne kaha ki teenage me bachhe garm iron ki tarah hote hai jinhe kisi bhi shape me mold kiya ja sakta hai. Agar social phobia ke reasons ki baat kare to ye generally do kaarno ki wajah se hota hai.

Social Anxiety Disorder Ke Kya Kaaran Hai?

1. Biological Reasons

• Social Anxiety Disorder par bahut se research kiye hai jisme ye paaya gaya hai ki ye biological reasons ki wajah se bhi hota hai. Matlab, agar kisi ke parents ko ye problem thi ya hai to usko ye samasya ho sakti hai.
• Autonomic Nervous System ke jaldi activate hone ki wajah se bhi kai baar log social phobia ke shikar ho jaate hai.
• Amygdala – Ye dimaag ka wo hissa hai jo aapko dar, bechaini, aur ghabraahat ka ehsaas dilaata hai. Agar kisi insaan men amygdala jyada sensitive hai to wo social phobia ka shikar jaldi ho sakta hai

2. Psychological Reasons

• Kuch logo ko unke life me aise experiences hote hai jiski wajah se bhi social phobia ho jaata hai. For example, agar koi bina wjajah pit jata hai ya fir uske sath kuch bahut galat ho jaata hai to us insaan ko logo se nafrat ho jaati hai. Natijan unko social anxiety disorder ka saamna karna padta hai.
• Overthinking ki wajah se bhi ye samasya ho sakti hai. For example, kuch logo kuch jyada hi sochte hai. Jaise ki unhone jo shirt pehni hai wo kaisi lag rahi hai, log kya soch rahe honge iske baare me, kya mai achha lag raha hu, wagairah wagairah. Aise logo ko aksar aisa mehsus hota hai ki saamne waala insaan unke baare me hi baate kar raha hai.

Agar aapko ye post achha laga ho to apne dosto ke sath share jaroor kijiyega. Agar aapko LifeStyle News padhna pasand hai to aap humare Celeb News, Fashion Tips, Beauty Tips, Food Tips, Health Tips, aur Love & Life section ke post padh sakte hai. Humne ek Romanian channel bhi launch kiya hai – Adnana Alexe. Humare social media channels ko bhi follow kar ke aap up-to-date reh sakte hai.