Haal chaal kya hain janaab? Suna hai sadke bann rahi hai aur ‘vikas’ phir se nazar aa raha hai? Aur suna hai 2019 election bhi nazdeek hai! Itefaak dekh rahe hain? ‘Chunaav’ aur ‘Vikas’ sath-sath chalte hai humaare desh mei!
UP Chunav Me Badhe Daavedar
Khair chodiye, bohot se aaye, bohot se gaye, par maan gye ‘Modi Ji’ aap ne ‘chor-chor mausere bhai’ sunne ke sath ab dikhwa bhi diya! Kya Mamata Didi, kya Akhilesh bhaiya, aur kya Behen-ji Mayawati – sab ke sar pe ‘BJP Hatao’ ka bhoot sawaar hai. Issi khel ka naya mohra bani, Congress Chief Rahul Gandhi (haan ji naam to suna hi hoga) ki behen, Priyanka Gandhi, ab UP-chunaav mein bhai ji ka sath dene aa pohonchi hai.
Agar aap news nahi dekhte, to hum bata dete hai ki ab Congress ne Rahul ke sath Priyanka ko UP-Elections mein daavedaar bana dia hai. Ab bhai-behen ek dusre ka sath de, ye to laazmi hai, par BJP ko ye gawara nahi!
BJP ke varisth netao mein se ek, Swami Ji, haan ji wahi Subramaniam Swamy ab phir ek baar apni commentry ke liye charcha ka vishaye ban gye! Swami ne keh daala Priyanka Gandhi ko Bi-Polar, aur kaha ki kaise janata karegi ek ‘manasik santulan’ kho bethi beti ka aamantran? Bola, Priyanka Gandhi ko aata hai bhishan gussa aur tab wo logon ki pitaai karne pe bhi utar jaati hain. Yeh Swamy Ji ne tab kaha, jab Priyanka ne apni rally mein ‘Modi Ji’ ko ‘Uttar Pradesh’ mein ek paraaya ghoshit kara, aur kaha ki inka Uttar Pradesh mein koi adhikaar nahi hota, ye to Gujarati hain.
Swamy Ji kabhi kabhi Sambit Patra jaisi baate karne ke liye jaane jaate hai par agar vakaayi aisa hai, to Modi Ji, bitiya se bachke rahiyega! Kahin ‘Buzurg Vyvastha’ mein ‘Daant’ (Teeth) aur Khaat (Chair) dono cheen ke lejaae Rahul ki behena!
Priyanka Gandhi Ko Keh Diya Shurpanakha Aur Holika?
Bharatiya Janata Party (BJP) karyakartao ne to ye tak keh diya ki jis prakaar Ravana ne Shurpanakha ko Ram ke pas, aur Hiranyakashipu ne Holika ko Prahlad ke pas bheja tha, ussi prakaar, ab Rahul Gandhi apni behen Priyanka ka istemaal, Modi ko haraane ke liye karna chahte hai.
Ab BJP karyakarta, kitni chillam maare, yeh hum nahi keh sakte, par 2019 mein UP chunaav ka muqaabla dekhne-waala hoga! Kyu? Sahi kaha na?
